Shane Watson Big 5 Test batters in Cricket: ભારતના સુપરસ્ટાર બેટ્સમેન વિરાટ કોહલી તેની જ્વલંત બેટિંગ માટે જાણીતો છે. હવે ઓસ્ટ્રેલિયાના ભૂતપૂર્વ ઓલરાઉન્ડર શેન વોટસને ટેસ્ટ ક્રિકેટમાં પોતાના 5 સર્વશ્રેષ્ઠ બેટ્સમેનોની પસંદગી કરી છે, જેમાં તેણે વિરાટ કોહલીને ટોચ પર રાખ્યો છે. જ્યારે વિરાટ કોહલીએ 2019 બાદ ટેસ્ટ મેચમાં એકપણ સદી ફટકારી નથી.
આ પાંચ બેટ્સમેનોને સ્થાન આપવામાં આવ્યું
ઓસ્ટ્રેલિયાના ભૂતપૂર્વ ઓલરાઉન્ડર શેન વોટસને ટેસ્ટ ક્રિકેટમાં વર્તમાન ‘બિગ ફાઈવ’ બેટ્સમેનોની યાદીમાં વિરાટ કોહલીને સૌથી આગળ રાખ્યો છે. કોહલીએ નવેમ્બર 2019થી ટેસ્ટ મેચમાં એક પણ સદી ફટકારી નથી. વોટસને ICCના માસિક પોડકાસ્ટના નવા એપિસોડમાં કોહલીને પાકિસ્તાનના સુકાની બાબર આઝમ, ન્યુઝીલેન્ડના કેપ્ટન કેન વિલિયમસન, ઓસ્ટ્રેલિયાના સ્ટીવ સ્મિથ અને ઈંગ્લેન્ડના ટેસ્ટ કેપ્ટન જો રૂટથી આગળ રાખ્યા છે. કોહલી વિશે વાત કરતા શેન વોટસને કહ્યું છે કે તે ખૂબ જ સારી બેટિંગ કરે છે, તેની પાસે મેચને ટર્ન કરવાની ક્ષમતા છે. તેણે વધુમાં કહ્યું કે હું હંમેશા વિરાટ કોહલીને નંબર વન પર રાખીશ.
કોહલી નંબર વન પર
શેન વોટસને 33 વર્ષીય વિરાટ કોહલીને બિનસત્તાવાર ‘બિગ ફાઈવ’માં ટોચ પર રાખ્યો છે. વિરાટ કોહલીએ 101 ટેસ્ટની 171 ઇનિંગ્સમાં 49.95ની એવરેજથી 8043 રન બનાવ્યા છે, પરંતુ 2019થી તે એકપણ સદી ફટકારી શક્યો નથી. કોહલીની ક્લાસિક બેટિંગના દરેક લોકો દિવાના છે.
આ પાકિસ્તાની બેટ્સમેન બીજા નંબર પર
પાકિસ્તાનના બેટિંગ બેટ્સમેન અને કેપ્ટન બાબર આઝમને ઓસ્ટ્રેલિયાના ઓલરાઉન્ડર શેન વોટસને બીજા નંબરે રાખ્યો છે. બાબરે 40 ટેસ્ટની 71 ઇનિંગ્સમાં 45.98ની એવરેજથી 2851 રન બનાવ્યા છે. બાબર આઝમે ઓસ્ટ્રેલિયા સામેની શ્રેણીમાં ઘણા રન બનાવ્યા હતા. તેના કારણે પાકિસ્તાન પ્રથમ બે ટેસ્ટ ડ્રો કરવામાં સફળ રહ્યું હતું.
સ્ટીવ સ્મિથ ત્રીજા નંબર પર
બિગ ફાઈવની યાદીમાં ઓસ્ટ્રેલિયાનો સ્ટાર બેટ્સમેન સ્ટીવ સ્મિથ ત્રીજા નંબર પર છે. તેણે 85 મેચની 151 ઇનિંગ્સમાં 8010 રન બનાવ્યા છે. તે કોઈપણ પીચ પર રન બનાવવાની ક્ષમતા ધરાવે છે.
ચોથા નંબર પર ન્યૂઝીલેન્ડનો આ બેટ્સમેન
ન્યૂઝીલેન્ડના કેપ્ટન અને સુપરસ્ટાર બેટ્સમેન કેન વિલિયમસન ચોથા નંબર પર છે. વિલિયમસને 86 ટેસ્ટની 150 ઇનિંગ્સમાં 53.57ની એવરેજથી 7272 રન બનાવ્યા છે. જો કે સ્મિથ અને વિલિયમસનની બેટિંગ એવરેજ કોહલી કરતા સારી છે, શેન વોટસને તેમને કોહલીથી નીચે મૂક્યા છે. વિલિયમસનને લઈને વોટસને કહ્યું કે ન્યુઝીલેન્ડનો કેપ્ટન કોણીની સમસ્યાથી પરેશાન છે.
સૌથી નીચે જો રુટ
ઓસ્ટ્રેલિયાના શેન વોટસને ઈંગ્લેન્ડના કેપ્ટન જો રૂટને સૌથી નીચેના સ્થાને રાખ્યો છે. જ્યારે રૂટે 117 ટેસ્ટ મેચની 216 ઇનિંગ્સમાં 49.19ની એવરેજથી 9889 રન બનાવ્યા છે. વોટસને જો રૂટને લઈને કહ્યું કે ઈંગ્લેન્ડનો કેપ્ટન પહેલા જેટલો મોટો સ્કોર કરી શક્યો નથી. જો રૂટના નામે ટેસ્ટ ક્રિકેટમાં 25 સદી નોંધાયેલી છે.
