તન ભીના ને હૈયા સુકા, આ વખતે વરસાદમાં.
બે પંખીડા જુદા જુદા, આ વખતે વરસાદમાં.
ટીપે ટીપે આગ લાગી, ટશર ફૂટ્યા યાદના.
છાંટા જાણે હૈયે ખૂચ્યાં, આ વખતે વરસાદમાં.
લીલી લાગણીઓ છે સૂકી,ને સપનાઓ કોરા,
અરમાનો ના ગળે ડુમા, આ વખતે વરસાદમા.
સાથે વીત્યા ચોમાસાનાં, સંભારણા ની છાંટથી
ભીંજાયા આંખોના ખૂણા, આ વખતે વરસાદમાં.
રાહ જોતાં એકબીજાની, ભીંજાવાની આશ મા,
એક છત્રી ને બે ય જણા, આ વખતે વરસાદમાં.
– હાર્દિક મકવાણા(હાર્દ)
